A metamorfose do dragón, Dragal II

Antonte 5 de maio presentouse na sé canguesa da Federación de Comerciantes e Industriais do Morrazo, o segundo volume da triloxía fantástica Dragal, escrito pola xornalista Elena Gallego Abad, e publicado por Edicións Xerais de Galicia dentro da súa colección de literatura infantil e xuvenil "Fora de xogo".

Neste evento participaron a autora, asi como Helena Pérez, coordinadora da colección editora, e o presidente da Federación de Comerciantes (FECIMO) Xosé Bangueses.
Segundo subliñou Helena Pérez "o primeiro título de Dragal, a herdanza do dragón, foi publicado en abril de 2010 e foron editados 2.000 exemplares", "e dado o éxito acadado, imos proceder á súa reedición en breve", antes da saída do prelo do libro final de Dragal, o terceiro, arredor da primavera do ano que ven.

Sinopse de Dragal II, a metamorfose do dragón

Coa policía investigando o estraño roubo da igrexa de San Pedro, Mónica prepárase para acudir á súa cita na Poza da Moura. A moza non sabe aínda que a noticia da desaparición de Hadrián corre pola vila coma un regueiro de pólvora nin que alguén vixía de preto os seus pasos. Mentres agarda por ela, Dragal descobre, por primeira vez na súa milenaria existencia, a limitación dos seus poderes. Para recuperar o seu lugar privilexiado na escala biolóxica, o dragón ten que absorber a materia gris do cerebro de Hadrián e acadar a simbiose da súa alma. Se consegue humanizarse o mundo será seu, mais do contrario... Na procura dun milagre que lles axude a salvar o seu amigo, Mónica e don Xurxo deberán desvelar as claves agochadas na milenaria igrexa de San Pedro. Daquela descubrirán que, para cumprir os designios da profecía, os cabaleiros da Orde de Dragal xa iniciaron o seu regreso